યુકેમાં લંડન પછી બીજા નંબરનું સૌથી મોટું શહેર છે બર્મિંગહમ. બંને વચ્ચેનું અંતર લગભગ ૧૧૦ મેલ એટલે લંડનથી લગભગ બે-અઢી કલાકની મુસાફરી થાય. ટ્રાફિક હોય તો સમય વધારે લાગે. વેસ્ટ મિડલેન્ડ ક્ષેત્રમાં આવેલું આ શહેર વ્યાપાર- ઉદ્યોગથી ધમધમે છે.

બર્મિંગહમમાં આવતા વર્ષે ૨૮ જુલાઈથી ૮ ઓગસ્ટ સુધી કોમનવેલ્થ ગેમ્સનું આયોજન થવાનું છે એટલે ત્યાં જોરશોરથી તૈયાર ચાલી રહી છે. ૧૧ દિવસ ચાલનારા આ રમતોત્સવનો ખર્ચ લગભગ ૩૦૦ મિલિયન પાઉન્ડનો અંદાજવામાં આવ્યો છે અને તે સંપૂર્ણપણે સરકારી તિજોરીમાંથી આવવાનો છે. તેમાં કોમનવેલ્થના કુલ મળીને ૭૨ દેશ અને ટેરીટરીઝ ભાગ લેશે. લગભગ ૬૫૦૦ જેટલા રમતવીરો અને રમત સાથે સંકળાયેલા લોકો આ સમયે બર્મિંગહામ આવશે. રમતોનું ટીવી પ્રસારણ લગભગ ૧.૫ બિલિયન એટલે કે ૧૫૦ કરોડ લોકો જોશે તેવું અનુમાન છે તથા પ્રત્યક્ષ રીતે જોવા માટે ૧૦ લાખ ટિકિટોનું વેંચાણ કોમનવેલ્થ ગેમ્સ ૨૦૨૨ની વેબસાઈટ પર આજથી શરુ થયું છે.

આ રમતોનું આયોજન કરવાની તૈયારી ઘણા સમયથી ચાલુ છે અને તેમાં કુલ મળીને લગભગ ૪૦,૦૦૦ જેટલા લોકો કામ કરશે. રમતો માટે સુવિધા તૈયાર કરવા આ વિસ્તારમાં ૧૪૦૦ જેટલા નવા ઘર બનાવાઈ રહ્યા છે અને કુલ મળીને અહીં થનારી વ્યવસ્થામાં અને તેના પછી વેસ્ટ મિડલેન્ડ વિસ્તારની અર્થવ્યવસ્થાને ૧ બિલિયન પાઉન્ડ જેટલો ફાયદો થશે તેવું અનુમાન છે. વેસ્ટ મિડલેન્ડના વિસ્તારને વધારે વિકસાવવા અને અહીંની અર્થવ્યવસ્થાને વધારે મજબૂત બનાવવા આ ગેમ્સને એક સાધનરૂપ માનવામાં આવી રહી છે અને તેઓ કોમનવેલ્થ ગેમ્સ ૨૦૨૨ને એક યાદગાર અનુભવમાં બદલવા માંગે છે. અત્યારસુધીની કોમનવેલ્થ ગેમ્સમાં આ સૌથી મોટી હશે અને તેમાં ૧૯ રમતો રાખવામાં આવી છે જેમાં ૮ પેરા-એથ્લેટિક ગેમ્સનો પણ શમાવેશ થાય છે. ઉપરાંત આ સંપૂર્ણ રમતોત્સવ કાર્બન ન્યુટ્રલ થવાનો છે અને તેમાં મહત્તમ અંશે પુનઃપ્રાપ્ય ઉર્જાસ્ત્રોતોનો ઉપયોગ થશે. રમતોમાં સુંદર સાંસ્કૃતિક કાર્યક્રમ પણ યોજાશે અને તેની તૈયારી એ વ્યક્તિના માર્ગદર્શન હેઠળ ચાલી રહી છે જેને લંડન ઓલમ્પિકમાં સંકૃતિક કાર્યક્રમનું આયોજન કરેલું જેની પાછળનો કુલ ખર્ચ ૧૨ મિલિયન પાઉન્ડ છે.

જે રીતે ઓલમ્પિકની શરૂઆત પહેલા તેની મશાલ ભાગ લેનારા દરેક દેશોમાં મુસાફરી કરે છે તેવી જ રીતે કોમનવેલ્થ ગેમ્સ માટે મહારાણીનું બેટન ભાગ લેનાર દરેક દેશ અને વિસ્તારમાં ફરે છે. આ વખતે આ બેટનની ૨૯૪ દિવસની મુસાફરીની શરૂઆત મહારાણીના સત્તાવાર નિવાસસ્થાન બકિંગહામ પેલેસથી ૭ મી ઓક્ટોબરે થઇ ગઈ છે. આ બેટન ભારતમાં દિલ્હી અને હૈદરાબાદમાં ૧૨-૧૫ જાન્યુઆરી ૨૦૨૨ના દિવસોમાં આવવાનું છે. કુલ ૧૪૦,૦૦૦ કિલોમીટરની મુસાફરી પુરી કરીને ફરીથી ૨૮મી જુલાઈ ૨૦૨૨ના રમતોત્સવના ઉદ્ઘાટનના દિવસે તે બર્મિંગહામમાં આવશે. લંડનમાં ૧૯૩૪ અને માન્ચેસ્ટરમાં ૨૦૦૨માં કોમનવેલ્થ ગેમ્સ યોજ્યા પછી ઇંગ્લેન્ડ ત્રીજી વખત પોતાની ધરતી પર આ રમતોત્સવ યોજી રહ્યો છે.

આ રમતોત્સવ માટે ઓરિજિનલી દક્ષિણ આફ્રિકાના ડર્બન અને કેનેડાના એડમોંટન શહેરોએ દાવેદારે નોંધાવી હતી. પછીથી કેનેડાએ દાવેદારી ખેંચી લેતા માત્ર ડર્બન બચ્યું હતું અને ગેમ્સ દક્ષિણ આફ્રિકાને ફાળવવામાં આવી હતી. પરંતુ માર્ચ ૨૦૧૭માં દક્ષિણ આફ્રિકાએ આર્થિક સંકટનું કારણ આપીને આ રમતોત્સવનું યજમાન પદ છોડી દીધું. ત્યારબાદ ફરીથી આ રમતોત્સવ યોજવા માટે દાવેદારી મંગાવવામાં આવી અને તેમાં બર્મિંગહામ, લિવરપૂલ, લંડન અને માન્ચેસ્ટર – ચારેય ઇંગ્લેન્ડના શહેરોએ દાવેદારી નોંધાવી. થોડા સમયબાદ વારાફરતી માન્ચેસ્ટર અને લંડને પોતાની દાવેદારી પછી ખેંચી અને તેથી લિવરપૂલ તથા બર્મિંગહામ વચ્ચે જ સ્પર્ધા રહી. આખરે આ બંને શહેરોમાંથી કોમનવેલ્થ ગેમ્સ કમિટીએ બર્મિંગહામના પ્રપોઝલની પસંદગી કરી અને તેને યજમાન પદ આપ્યું. આ રીતે જોઈએ તો બર્મિંગહમને તૈયારી માટે ઘણો ઓછો સમય મળ્યો કહેવાય પરંતુ તૈયારી સારી ચાલી રહી છે અને શહેરમાં તેનો ઉત્સાહ પણ દેખાઈ રહ્યો છે. ભારતથી પણ રમતવીરો આ રમતોત્સવમાં ભાગ લેવા આવશે અને સારી સંખ્યામાં પદક જીતે તેવી આશા રાખીએ.