આફ્રિકામાં ફરીથી એક વધારે સૈન્ય બળવો થયો અને સરકારને ખસેડીને ત્યાંના સૈન્યએ સત્તા અખત્યાર કરી છે. આ ઘટના બની છે માધ્ય આફ્રિકાના પશ્ચિમ કિનારે આવેલા ગેબોનમાં. ગેબોન લગભગ યુનાઇટેડ કિંગડમ જેટલો વિસ્તાર ધરાવતો દેશ છે પરંતુ ત્યાં વસ્તી માત્ર ૨૪ લાખ છે. બાકીના વિસ્તારમાં ગાઢ જંગલ છે. અહીંના લોકોની ખરીદ શક્તિના આધારે વાર્ષિક માથાદીઠ આવક ૧૨,૮૦૦ ડોલર જેટલી છે જે ભારતના લોકોની ૭,૧૩૦ ડોલર કરતા ઘણી વધારે છે. પરંતુ અહીં મોટાભાગની અવાક મુઠીભર લોકોના હાથમાં આવે છે અને પરિણામે બાકીના લોકો દારુણ ગરીબીમાં જીવે છે. આ દેશ ખનીજ તેલ અને કોકોને કારણે સમૃદ્ધ છે.

સૈન્યના બળવો કરવાનું તાત્કાલિક કારણ છે ગેબોનમાં થયેલી ચૂંટણી જેમાં સત્તારૂઢ પ્રેસિડેન્ટ અલી બૉન્ગોએ પોતાની જાતને બે-તૃતીયાંશ બહુમતીથી વિજેતા જાહેર તો કર્યા પરંતુ વિરોધપક્ષે એવો દાવો કર્યો કે તેના ઉમેદવાર આલબર્ટ ઓનડો ઓસા આ ચૂંટણી જીત્યા છે. દેશમાં શાંતિ જળવાઈ રહે તેવા હેતુથી પોતે સત્તાગ્રહણ કરે છે તેવું કહીને ગેબોનના સૈન્યએ ૨૦૦૯થી સત્તારૂઢ પ્રેસિડેન્ટ બૉન્ગોને નજરકેદ કર્યા છે. બૉન્ગોએ પોતાના ઘરમાંથી વિડિઓ મેસેજ દ્વારા આંતરરાષ્ટ્રીય સમુદાયને અપીલ કરી છે કે તેઓ ગેબોનની લોકશાહીને બચાવે.

નોંધપાત્ર છે કે ગેબોન ૧૯૬૦માં ફ્રેન્ચ સાશનમાંથી સ્વતંત્ર થયું ત્યારથી અત્યાર સુધીમાં માત્ર ત્રણ જ પ્રેસિડેન્ટ આવ્યા છે. અલી બૉન્ગોના પિતા ઓમર બૉન્ગો ૧૯૬૭થી લઈને ૨૦૦૯ સુધી પ્રેસિડેન્ટ રહેલા. વર્ષ ૨૦૦૯માં તેમના અવસાન બાદ તરત બે પ્રેસિડેન્ટ ખુબ ટૂંકા ગાળા માટે – અનુક્રમે ૩૫ દિવસ અને ૧૨૮ દિવસ – સત્તા પર આવેલા અને પછીથી અલી બૉન્ગો પ્રેસિડેન્ટ બન્યા. આ રીતે ૧૯૬૭થી લઈને આજ સુધી બૉન્ગો પરિવારનું આ ૪૧ વર્ષનું સાશન હવે સૈન્યના બળવાને કારણે અટક્યું હોય તેવું લાગે છે.

પ્રેસિડેન્ટ અલી બૉન્ગોનો જન્મ ફેબ્રુઆરી ૧૯૫૯માં ગેબોનના પાડોસી દેશ કોંગો-બ્રાઝવીલેમાં થયેલો. ત્યારે તેમનું નામ અલીઅન બર્નાર્ડ બૉન્ગો હતું. વર્ષ ૧૯૬૭માં તેના પિતા ઓમર બૉન્ગોએ ગેબોન પર સાશન સ્થાપ્યું. વર્ષ ૧૯૭૩માં બાપ દીકરો બંને મુસ્લિમ બની ગયા અને એ રીતે અલીઅન બર્નાર્ડ બૉન્ગો અલી બૉન્ગો બન્યા. અલી બૉન્ગો વિષે એવું કહેવાય છે કે તેઓ રંગીલા મિજાજના છે. તેમની યુવાનીમાં તેઓએ મ્યુઝિક આલબમ પણ બનાવેલું અને તેઓ ફૂટબોલના જબરદસ્ત પ્રસંશક છે. જો કે તેના પિતાએ તેને ગેબોન પર સાશન માટે માનસિક રીતે તૈયાર કરી રાખ્યા હતા. પ્રેસિડેન્ટ બનતા પહેલા પોતાના પિતાની કેબિનેટમાં તેઓ વિદેશ મંત્રી અને સુરક્ષા મંત્રી પણ રહી ચૂકેલા.

આફ્રિકામાં, ખાસ કરીને પૂર્વ ફ્રેન્ચ શાસિત પ્રદેશોમાં જે રીતે એક પછી એક બળવા થઇ રહ્યા છે તે ચિંતાનો વિષય છે. પહેલા બુર્કિના ફાસો, માલી પછી તાજેતરમાં નાઈજર અને હવે ગેબોન. આ બધા બળવા પાછળ કોઈ કનેક્શન ખરું કે કેમ તે કહેવું તો મુશ્કેલ છે પરંતુ આ સહેલ પ્રદેશ થોડો અસ્થાયી તો બની જ ગયો કહેવાય. આ ચારેય દેશોમાં ક્યારે લોકશાહી સ્થપાશે તે કહી શકાય તેમ નથી કેમ કે એકવાર મિલિટરીના કબ્જામાં આવ્યા પછી આસાનીથી રાજકીય દળોને સત્તાનું હસ્તાંતરણ આસાનીથી થઇ શકતું નથી. ખાસ કરીને જ્યાં આર્થિક રીતે વર્ગભેદ વધારે પ્રવર્તતો હોય, જ્યાં હિંસા થવાની શક્યતા વધારે હોય ત્યાં. આ રીતે આફ્રિકામાં અત્યારે રાજકીય અસ્થિરતા ફેલાઈ છે અને હવે તે ક્યાં સુધી રહેશે તે કહેવું મુશ્કેલ છે. ફ્રાંસે ગેબોનમાં થયેલા મિલિટરી બળવાને વખોડ્યો છે અને ચૂંટણીના પરિણામોને માનીને ફરીથી બૉન્ગોને સત્તા હસ્તાંતરિત કરવા અપીલ કરી છે પરંતુ ફ્રાન્સનો પ્રભાવ હવે આફ્રિકામાં પહેલા જેટલો રહ્યો નથી. કેટલાક લોકો મિલિટરીએ સત્તા ગ્રહણ કરી તેના હર્ષમાં શેરીઓમાં આવીને હર્ષોલ્લાસ માનવી રહ્યા હતા એ જોતા એવું પણ લાગે છે કે ૧૯૬૭થી એક જ પરિવારના સાશનને ઘણા લોકો પસંદ ન પણ કરતા હોય. અત્યાર સુધી સૈન્ય બળવા વિરુદ્ધ કોઈ ખાસ પ્રતિભાવો જોવા મળ્યા નથી.